وفاقی وزیر داخلہ شیخ رشید احمد نے یوم فلسطین کے حوالے سے جاری پیغام میں کہا ہے کہ راولپنڈی کا بچہ بچہ اپنے فلسطینی اور کشمیری بھائیوں کے ساتھ کھڑ ا ہے۔آج سب لوگ عمران خان کی ایک کال پر فلسطینیوں سے اظہار یکجہتی کے لئے نکلے ہیں۔
تفصیلات کے مطابق لال حویلی میں یوم فلسطینی کے حوالے سے نکالے جانے والی ریلی سے خطاب کرتے ہوئے شیخ رشید کا کہنا تھا کہ مجھے اللہ پر پورا یقین ہے اور ایک دن مسئلہ فلسطین اور کشمیر حل ہو کر رہے گا۔ساری دنیا جانتی ہے کہ لال حویلی کا کشمیر کے لال چوک سے اور فلسطین کی جدوجہد سے گہرا تعلق ہے،ہم نے ہر دور میں ظلم کے خلاف ایک تحریک چلائی ہے،ہمار ایمان ہے کہ مسلمان جہاں بھی بستا ہے وہ اللہ اور اس کے رسول کا علم بلند رکھے گا۔ شیخ رشید کا کہنا تھا کہ ختم نبوت کی حفاظت کا بیڑا لال حویلی نے اٹھا یا ہے اور وقت آنے پر ہم یہ ثابت کریں گے ہم بھی غلامان رسول ہیں اور غلام رسول پر فرض ہے کہ وہ فلسطین اور کشمیر کی آزادی کے لئے ہر وقت تیار رہے ۔میں مشکور ہوں کہ آج وزیرا عظم عمران خان نے فلسطین کی عوام سے اظہار یکجہتی کے لئے یوم احتجاج کی کال دی۔
وفاقی وزیرکا کہناتھا کہ ہم سب ایک ہیں، اور جو بھی راولپنڈی کے رہنے والا ہے چاہے اس کا جس بھی جماعت سے تعلق ہو ہم کشمیر اور فلسطین کی آزادی کے لئے ایک ہیں اور انشاءاللہ ایک ہی رہیں گے۔
